Biex niċċelebraw l-aħħar Dehra tal-Madonna ta’ Fatima, ġiet organiżżata velja fit-12 ta’ Ottubru 2018, li fiha ġie reċitat rużarju meditat, sar talb speċjali għall-familji permezz tal-konsagrazzjoni lill-Madonna u mbagħad barka sagramentali.  Kien mument b’devozzjoni u qima lejn il-Madonna, omm il-familji.

L-għada, 13 ta’ Ottubru, ġiet iċċelebrata l-Aħħar Dehra tal-Madonna ta’ Fatima.  Għalkemm għaddejna n-nofs ta’ nhar ta’ filgħodu u parti wara nofsinhar b’qalbna ttertaq minħabba l-maltemp, fis-6.00pm b’fidi qawwija ħallejna l-Madonna tmexxina u għalhekk bdejna l-pellegrinaġġ kif kien pprogrammat.  Imxejna Triq l-Orsolini ngħidu r-rużarju u nkantaw l-Ave ta’ Fatima.  Wasalna fis-Santwarju fejn l-E.T. Mons Isqof awżiljarju Joseph Galea Curmi, wara li akkompanja l-pellegrinaġġ, iċċelebra l-quddiesa ma’ diversi saċerdoti u l-komunita miġbura.  Mal-wasla fis-Santwarju, it-tfal kienu pronti biex jagħtu l-messaġġ tal-Aħħar Dehra b’rappreżentazzjoni sempli u sabiħa.  Wara l-quddiesa, l-Isqof fetaħ u bierek wirja b’vari, pitturi u xbiehat oħra tal-Madonna fis-Sala tal-Parroċċa.

Il-Kappillan, Patri Vince Micallef OP, jirringrazzja lil dawk kollha preżenti.  Ħajr imur ukoll lill-Grupp The Church in Need li għoġbu jakkompanja dawn iċ-ċelebrazzjonijiet flimkien magħna.

Kienu 50 djaknu reliġjużi u djoċesani li ġew ordnati saċerdoti mill-Eċċ. Tiegħu Mons. Arċisqof Mikiel Gonzi fil-Kon-Katedral ta’ San Ġwann, nhar l-20 ta’ Lulju 1974.  Kienet ukoll okkażjoni speċjali għall-Arċisqof li kien qed jiċċelebra 50 sena bħala isqof.

Ta’ kull sena dan il-grupp, jien wieħed minnhom, niċċelebraw l-anniversarju saċerdotali tagħna f’xi knisja parrokkjali.  Din is-sena, ingħaqadna mal-festa ġubilari ta’ 50 sena tas-Santwarju tagħna bħala parroċċa, u ċċelebrajna l-anniversarju tagħna taħt il-ħarsien tal-Madonna ta’ Fatima.  Fostna bħala grupp diġa hemm min qiegħed igawdu l-premju tiegħu fis-sema mal-Ħallieq tagħna.  Dawk illi setgħu ingħaqadna  biex niċċelebraw flimkien il-quddiesa.

Jien nirringrazzja lis-saċerdoti li ċċelebraw miegħi dan il-mument.  Nirringrazzja wkoll lil dawk il-parruċċani li qasmu magħna dan il-mument ta’ radd il-ħajr u ferħ bil-preżenza tagħhom.  Itolbu għalina ħalli nkomplu naqdu din il-missjoni li Alla fdalna f’idejna biex fi Kristu, ma’ Kristu u bi Kristu nwettqu dak li jrid Hu.

Il-festa t-tajba

27 ta’ Mejju sat-03 ta’ Ġunju 2018

L-Ewwel Tqarbina – il-Ħadd, 27 ta’ Mejju: fid-9.00am it-tfal flimkien mal-katekisti u l-ġenituri joħorġu mill-kunvent f’purċissjoni lejn is-Santwarju u fid-9.30am niċċelebraw il-quddiesa.

It-Tnejn, 28 ta’ Mejju: Jum it-Tfal
Fis-6.30pm Quddiesa ċċelebrata minn P. Ivan Attard OP, viċi-Kappillan. Issir ukoll l-inkurunazzjoni tal-Madonna u wara party fuq iz-zuntier.

It-Tlieta, 29 ta’ Mejju: Jum l-Anzjani
9.00am Quddiesa għall-anzjani mill-kappillan P. Vince Micallef OP.  Jiġi wkoll amministrat is-sagrament tal-Griżma tal-morda.

• It-Tlieta, 29 ta’ Mejju, filgħaxija Quddiesa għall-ex-Abbatini:
  6.00pm     Rużarju
  6.30pm     Quddiesa mill-kappillan P. Vince Micallef OP bil-kant mill-folk group tal-Parroċċa.

• L-Erbgħa, 30 ta’ Mejju: l-Ewwel Jum tat-Tridu – Marija, mudell ta’ kulħadd
  00pm     Rużarju meditat mil-Leġjun ta’ Marija u l-Ħniena Divina
  6.30pm     Quddiesa bl-omilija minn P. Aaron Zahra OP . Wara kurunella, innu, antifona u barka sagramentali.
• Il-Ħamis, 31 ta’ Mejju: It-tieni Jum tat-Tridu – Marija u t-talba tar-rużarju
  00pm Rużarju meditat mill-Ministri tat-Tqarbin u Lajċi Dumnikani
  6.30pm     Quddiesa bl-omilija minn Fr Vince Micallef OP, Kappillan u Pirjol tal-Kunvent tad-Dumnikani, G’Manġa.   Wara kurunella, innu, antifona u barka sagramentali.
• Il-Ġimgħa, 01 ta’ Ġunju: it-Tielet Jum tat-Tridu – Marija, omm il-Familji
  00pm Rużarju meditat mill-Kummissjoni Familja
  6.30pm     Quddiesa bl-omilija Fr. Joe Zammit.  Mistednin speċjali l-koppji li żżewġu tul is-sena li għaddiet u dawk li għalqu 10, 25, 40, 50 (meta twaqqfet il-Parroċċa) u 60 sena żwieġ.  Wara kurunella, innu, antifona u barka sagramentali.  Fl-aħħar isir t-tberik u l-preżentazzjoni tat-tfal lill-Madonna.
• Is-Sibt, 02 ta’ Ġunju: lejliet il-Festa
  5.30pm Rużarju meditat mil-Lajċi Dumnikani.
  6.00pm     Transulazzjoni bir-relikwa tal-Qaddisin ta’ Fatima mill-Kunvent sas-Santwarju.  Innu, antifona u quddiesa bl-omilija minn P. Reno Muscat OP u barka sagramentali.

• Il-Ħadd, 03 ta’ Ġunju: Jum il-Festa
  9.00am Quddiesa solenni minn P. Frans Micallef OP, provinċjal tad-Dumnikani u paniġierku minn Dun Anthony Fitzpatrick.
• 6.00pm     quddiesa mill-E.T. Mons. Arċisqof Emeritus Pawlu Cremona OP.
  7.00pm     Mons. Cremona imexxi l-Purċissjoni bil-vara tal-Madonna ta’ Fatima li tgħaddi mit-Toroq S. Monika, Blackley, Telgħet G’Manġa, Xatt, Duluri – quddiem il-knisja tad-Duluri jsir mument  ta’ talb marjan.  Tkompli Triq id-Duluri, Schinas, K. Mifsud, S. Ġużepp, Hookham Frere u S. Monika.
  10.15pm    Nilqgħu x-xbieha tal-Madonna ta’ Fatima lura lejn is-Santwarju-Parrokkjali bil-kant tal-antifona w il-barka sagramentali.

Matul il-ġranet tal-festa Il-kant ikun immexxi mill-Kor Parrokkjali San Tumas ta’ Akwinu taħt id-direzzjoni tal-Mro Noel Ciantar. 

Inħeġġu lill-parruċċani li jżejnu l-gallarija minn fejn tgħaddi l-purċissjoni b’qima lejn Ommna Marija. Il-Festa t-tajba lil kulħadd.